Mahyavanshi Educational & Charitable Trust (MECT)
for Higher Studies under the Pay Back to Society Scheme
VIDYA SETU 2026
Thank you for your interest in the Vidya Setu Financial Assistance Programme. Applications for the 2026 academic year are now closed.
We sincerely appreciate the interest and participation of all students and families.
શિક્ષણ, સ્વાવલંબન અને સમાજ ઋણ સ્વીકાર: MECT ના ઉપપ્રમુખશ્રી હિતેષ એમ. ઉમરીયાનો દૃષ્ટિકોણ
શિક્ષણથી સ્વ-વિકાસ અને ‘પે-બેક ટુ સોસાયટી’થી સમાજ ઉત્કર્ષ!
“શિક્ષણ એ વિશ્વને બદલવા માટેનું સૌથી શક્તિશાળી શસ્ત્ર છે.”— નેલ્સન મંડેલા
નેલ્સન મંડેલાના આ અમર વિચારને આત્મસાત કરીને સમાજ ઉત્કર્ષના કાર્યમાં જોડાવાનો મને અવસર મળ્યો છે. માહ્યાવંશી એજ્યુકેશનલ એન્ડ ચેરિટેબલ ટ્રસ્ટ (MECT), સુરત ખાતે ૧૯ જુલાઈ, ૨૦૨૬ ના રોજ મને ઉપપ્રમુખ તરીકેની અગત્યની જવાબદારી સોંપવામાં આવી છે, ત્યારે હું અત્યંત ગૌરવ અને નમ્રતાની લાગણી અનુભવું છું. આ મહત્ત્વપૂર્ણ પદ પર મારી પસંદગી કરવા બદલ હું સમગ્ર કારોબારી સમિતિ, ટ્રસ્ટી મંડળ અને સમાજનો હૃદયપૂર્વક આભાર માનું છું.
માહ્યાવંશી સમાજ વર્ષોથી પોતાની સખત મહેનત, પ્રામાણિકતા અને સમર્પણ ભાવના માટે ઓળખાય છે. પરંતુ બદલાતા આધુનિક સમયમાં સમાજની વાસ્તવિક પ્રગતિ અને મુખ્ય ધારામાં મજબૂત સ્થાન મેળવવા માટે ઉચ્ચ શિક્ષણ અત્યંત અનિવાર્ય છે. સુરતના આંગણે જ્યારે અમે MECT ની સ્થાપના કરી, ત્યારે અમારો એક જ દ્રઢ સંકલ્પ હતો: “સમાજનો કોઈ પણ તેજસ્વી વિદ્યાર્થી માત્ર આર્થિક સંકડામણને કારણે શિક્ષણથી વંચિત ન રહેવો જોઈએ.”
ઘણીવાર એવું જોવા મળે છે કે શાળાકીય અભ્યાસમાં શ્રેષ્ઠ પ્રદર્શન કરનાર તેજસ્વી વિદ્યાર્થીઓ મેડિકલ, એન્જિનિયરિંગ કે અન્ય ટેકનિકલ અભ્યાસક્રમોની તોતિંગ ફીના કારણે પોતાના સપનાઓ મુકી દેવા મજબૂર બને છે. MECT આ આર્થિક અવરોધોની દીવાલ તોડવાનું મજબૂત માધ્યમ બન્યું છે. અમે માત્ર એકાદ વર્ષની ફી ભરીને અટકી નથી જતા, પરંતુ વિદ્યાર્થીનો અભ્યાસક્રમ સફળતાપૂર્વક પૂર્ણ ન થાય ત્યાં સુધી વાલી બનીને તેની આંગળી પકડી રાખવાની નેમ ધરાવીએ છીએ.
અમારા ટ્રસ્ટની સૌથી વિશિષ્ટ અને ગૌરવપૂર્ણ વિભાવના ‘પે-બેક ટુ સોસાયટી’ (Pay-Back to Society) છે. આ કોઈ વ્યાજબી કે આર્થિક બોજ નથી, પરંતુ નૈતિક જવાબદારીનો એક પવિત્ર સેતુ છે. આજે જે વિદ્યાર્થીને ટ્રસ્ટ દ્વારા સહાય મળે છે, તે ભવિષ્યમાં પોતાની કારકિર્દીમાં સ્થિર થઈને આ રકમ સંસ્થાને પરત કરે છે, જેથી તે જ રકમમાંથી સમાજના અન્ય કોઈ જરૂરિયાતમંદ વિદ્યાર્થીનું ભવિષ્ય ઉજ્જવળ બનાવી શકાય. આ એક અવિરત ચાલતું ચક્ર છે. તાજેતરમાં જ આપણા સમાજની એક તેજસ્વી દીકરીએ M.Tech પૂર્ણ કર્યા બાદ પોતાની સહાયની રકમમાંથી રૂ. ૨૫,૦૦૦/- પરત આપીને આ ‘પે-બેક ટુ સોસાયટી’ ના સિદ્ધાંતને સાર્થક કરી બતાવ્યો છે, જે આપણા સૌ માટે પ્રેરણારૂપ છે.
સૌથી ગર્વની ક્ષણ તો એ હતી જ્યારે આપણી એક દીકરીએ સ્પેસ સાયન્સ એન્ડ ટેકનોલોજીમાં પોતાનું રિસર્ચ પેપર રજૂ કર્યું અને આજે તે ઇંગ્લેન્ડ ખાતે કાર્યરત છે. આ સફળતા સાબિત કરે છે કે જો આપણા બાળકોને યોગ્ય તક અને પ્રોત્સાહન મળે, તો તેઓ આકાશ આંબવાની ક્ષમતા ધરાવે છે.
શિક્ષણની સાથે સાથે MECT ટ્રસ્ટ મહિલા સશક્તિકરણ, રોજગારી પૂરી પાડવા અને સામાજિક ઉત્થાન માટે પણ પૂરી નિષ્ઠાથી કટિબદ્ધ છે. અમારું વિઝન માત્ર ડિગ્રીધારી યુવાનો તૈયાર કરવાનું નથી, પરંતુ ઉત્તમ સંસ્કાર અને સમાજ પ્રત્યે સંવેદનશીલતા ધરાવતા શ્રેષ્ઠ નાગરિકોનું નિર્માણ કરવાનું છે.
આ તકે, હું સંસ્થાના પ્રમુખ શ્રી મનહરભાઈ ભેસાણીયા, મંત્રી શ્રી સુરેશભાઈ ભારતી, નવા નિમાયેલા કારોબારી સભ્યો, તમામ ટ્રસ્ટીશ્રીઓ, ઉદાર મનના દાતાશ્રીઓ અને ઉત્સાહી સ્વયંસેવકોનો આભાર વ્યક્ત કરું છું. આપ સૌના નિઃસ્વાર્થ સહકાર વગર આટલી ટૂંકી અવધિમાં આટલી મોટી સિદ્ધિઓ શક્ય નહોતી.
આવો, આપણે સૌ સાથે મળીને કરુણા, હિંમત અને સામુદાયિક એકતાના બળે શિક્ષણના આ પવિત્ર યજ્ઞમાં આપણું શ્રેષ્ઠ યોગદાન આપીએ અને એક એવા સમૃદ્ધ સમાજનું નિર્માણ કરીએ જ્યાં શિક્ષણ એ દરેક બાળકનો જન્મસિદ્ધ અધિકાર બને.
જય માહ્યાવંશી | જય જય ગરવી ગુજરાત!
(નિમણૂક તારીખ: ૧૯ જુલાઈ, ૨૦૨૬)
